يخلق من الشبه اربعين!!!!

سلام عليكم
يقولون ان الله يخلق من الشبه اربعين لكني مانب اصدق هالكلام كل واحد يشبهني بشي يعني مثلا امي تقول انك طبق الاصل من ياسر القحطاني وابوي يقول ماشالله انت ورضا تكر وجهان لعملة واحدة ( عاد مدري وش هي هالعملة شكلها عملة كينيا ) واخوي يقول محمد الشلهوب لو يطول شوي كان اقول انه انت يعني مابقا الا تشبيهين او ثلاثة واسوي منتخب لحالي لكن ماكتفوا الناس بهالكلام بعد يقولون ان الاربعين اللي يتشابهون ذولا يكونون متشابهين من ناحية التصرفات

بما ان السالفة كيت وكيت .. واشوف كل من طراله قال اهدي هالموضوع لفلان وعلتان انا مانب ناقص بهدي الموضوع ذا لقائمة التسع وثلاثين اللي معي في اللسته حقت الشبه بس لايكون منهم واحد يلبس غترة تراني متبري منه ليوم الدين

مافي شي مزعج بالحياة اكثر من اتصال آخر الليل قمت حوالي الساعه وحده ونص على رنة الجوال رديت ولاه امي تبين اجي للمزرعه اخذ ولد خالتي اوديه للمستشفى لانه تعبان جدا وعلى وصف امي تقول انه ( يتوع ويزوع ) <<< القصيم لانقويتش
طلعت وانا اجر ثلاثين كيلو نوم وراي المزرعه بعيده شوي وفي منطقة نائية كلها مزارع واغلبها مهجور وانا امشي في طريق مظلم يمين ويسار نخيل واشجار بعد ثلث ساعه مشي في هالخط المخيف لمحت نقطه تفتيش مفاجأة الظاهر عندهم بلاغ اول ماشافوني تفاجأوا وكلهم رفعوا اسلحتهم واحد منهم بيتشقلب بحركة بوليسية مثل الافلام ويصقع في صدام السيارة الثاني متوزي ورا السيارة ويقول سلم نفسك يا معشي المكان كله محاصر ( لحظة صمت ) اناظر يمين ويسار وورا ادور هالمحاصرين ولا ماسمع الا صفاراة الليل والتفت على العسكري قال وش عرفك انت مايبانون الا وقت الجد فجأة ظهر من بين النخيل والاشجار شخص طويل الشعر مترنح ويغني يقول ليتني طيرا اغني مثل عصفور الصباح الظاهر انه شارب ريحة خايس بعدين قرب للعسكري وهو ماسك مسدسه وموجهه لمي ويضمه ويبوسه مع خده ويقول لبى قلبك ياتهاني وبعدين كمل طريقه وهو يغني ( لحظة صمت ) انا اناظر بالعسكري وهو يرجف مدري خوف ولا شي ثاني رجع لصوابه وقال للعسكري الثاني رح فتش الموتر وانا مستسلم رافع ايدي فوق قال طلع الاسلحه يامعشي بالطيب احسنلك
قلت وش اسلحته والله مامعي ولا حتى نبيطة .. قال مالي شغل اعترف انك مخبيهن بمكان ثاني
ماخبيت شي ياطويل العمر والله ماخبيت . قال: اسمع اعترف احسنلك انا مالي شغل انت مظلوم بريء مذنب مالي شغل انا رجال مليت من المرابطه لي شهر ماشفت زوجتي والضابط قايلنا لاترجعون الا وانتم صايدينه تبتعرف ولا تراني وزيت حبوب وحشيش واسلحه وذخيره وكل شي ممنوع في سروالك انا شفت الدعوا خاربه خاربه ومتوهق بكل الاحوال قلت : الاسلحه بالشنطه تحت الاسبير راحوا يركضون فرحانين اني نطقت والله شكلهم شفقانين لزوجاتهم
هم فتحوا الشنطه من هينا انا ركضت لوسط النخل والاشجار من هنا واركض واركض مسافة كافية للوصول الا العراق مشيا عن الاقدام واشوف وسط الغابات والادغال <<< تو مزارع يالتسذوب
واشوف استراحه عليها لوحة مكتوب فيها ( نور الدين كمال اذا تبي الوناسه تعال ) << هذا على اللوحه مهو شعار ههههه
دخلت اثره مرقص وبار وملهى ليلي وكل شي محرم فيه شرب وتطريش حشيش ومتخدرات ورقص ودعاره قمار تزوير اوراق عماله متخلفة عقليا وامنيا .. طبعا كل هالهيصه تحت ادارة بنقالي وهو يعتبر الراس الكبير للبنقال في نجد اول ماشافني هالبنقالي اشر لثنين من رجال يجيبوني لمه اخذوني هالاثنين اللي على فكره لو اجمعهم كلهم ماجوا كبر فخذي مسوي بيخوفني مرسل اثنين بنقال المهم قالي وين انت تهرب عني ولا خفت والغيت اتفاقنا .. انا خفت اقول وش انت تكلم عنه ولا شي اتوهق قطع هالتفكير بصرخه قال اسمع يامعشي انت عندي زي الحشره بي وقت اجيبك اجيبك البلد هذي انا مشية على ركبة قهرني البنقالي بس اسكت لدواعي امنيه لذلك اللي ابيه بتسويه تفهم .. وعدنا بعد بكرا مع الجماعه راح اعطيك التعليمات قبله بساعه <<< والله حذر البنقالي الكلب
انتبهت لنور زي السفتي يشر بالسقف لكن بدون صوت رمشة عين ولا مافي الاستراحه الا انا اثاري رجال الهيئة مداهمين ... ادور البنقالي الكلب اجل ممشي البلد على ركبة هاه
اناظر مع طرف الباب ولاه هيصه وجنبليصه اللي هاج واللي ماسكينه ماعليه شي واللي متمسك في نخلة واللي يبتسي .. وحاله ماتقول الا جايتهم غارة جوية .. وانا مستمتع بالمشهد تلقيت طراق مع الهامه افقدني وعيي .. فقدت وعيي بولاية القصيم ولا استردته الا في الرياض تحديدا في حي البطحاء الدبلوماسي قوموني قالوا رح للسوق لم محل ( البوس ) تراه ينتظرك وانا امشي افكر الحين شلون ذولا يعرفونني بسمي وانا مادري وش السالفة ووشلون الشرطه تدورني وانا برضو مادري وش السالفة لايكون فاقدن ذاكرتي بس اجل انا مجرم وراعي امور الخنبقه ذي متخدرات واسلحه ومادري وش وانا امشي واشوف بنت تناظرني بغل وحقد اول ماوصلتني وتصفقني كف من شدته نشبت يدها في خدي وتبربر علي لهجة مافهمه وانا اناظره بتعجب قلت تكلمي عربي مافهم عليتس ويوم تكلمت عربي طلعت اللهجه الاولى افهم عليها اكثر ترجمة كلامها اني ساحب عليها واني اخذت اللي ابي وبعدين اختفيت <<< ترا ماهب كل الشباب تسذا
قلت مهو انا اللي انتي تقولين قالت يعني هذا العذر اللي عندك صدز عذرك اقبح من ذنبك قلت والله انا معشي يمكن انك تحسبينن انورخان ولا مهدي فيكيا ولا نصرتي علي <<< مخاويه منتخب ايران الظاهر
بربرت نفس الحاله الاولى ومشت وهي تبكي وتذرف الدموع والتفت ولا وراي نور الدين كمال الخبيث وهو يضحك يقول انت ماعليك منها اجيبلك اللي اطلق منها مع ان العرض اعجبني بس قلت لا لا فكنا تقعد تجيب من بنات جلدتك وتقلب تسبدي قال لا تنق اي جنسية تبي حتى لو اوروبيات قلت لا لا وخر بس هذولي كنهن سلق لا شحم ولا لحم اشمئز من كلامي وقال صدز انكم متخلفين ييالسعوديين تشوفون بنات يخققن العالم لكن مايعجبنكم سلق ومادري ايش وتجي وحده لابسه عباة ماطلع الا عيونها تجركم على وجيهكم وتخقون قلت ايه نحب الستر ماناكل الا الشي المغطى و النظيف اللي مكشوف وصخ و يجيه تسمم <<< طراه ان مرضى الايدز صاروا كثر مرضى السكر يالله لاتبلانا
قال المهم بس وعدنا اليوم مع الجماعه اضبط ساعك على ثمان والمكان ابرسلك اثنين يروحون معك ولاتخاف مضبطلي راس كبير بيتستر على العملية كله وبيلهي القوات الامنيه عنا الحين رح للعماره الي قدامك قل للاستقبال ( حصاني يلهوا بالمزرعه ) هذي شفرة وبيعرفك خذ الغرض من هناك وخلك جالس لين يجونك رجالي بس شف تراك تحت عيوني اي حركه منا ولا منا بتدفع ثمنه حياتك رحت لمه وقلت هالجملة وعطاني مفتاح قال غرفة 30 بالدور الرابع رقيت وفتحت الشقة لقيت شنطه مكتوب مقفلة عليها رقم سري جلست لين الساعه ثمان طق الباب
فتحت ولا اثنين شخص لابسين بدلات رسميه ونظارات شمسية ركضت اناظر مع الدريشه ولاه الوقت ليل وارجع لمهم قلت ياجماعه ترا غلطانين الحين ليل قالوا هذا برستيج انجز بس وامش ترا ورانا مدارس رحت معهم ومبيدي الشنطه اللي شكلي اباكله تأبيده بسبة بنقالي والله من زين النهاية لو انتحر اهون شوي من اني انسجن وانا اشتغل عند بنقالي
وصلنا عند عماره تقل مهجوره ماحولها شي دخلنا اثر فيه صفة رجال حوالي خمس نفس اللي معي بدلات رسميه ونظارات شمسيه وهي عماره مظلمه وخلقه الدنيا ليل قالوا انت معشي قلت ايه انا قال جبت الغرض .. عاد انا ودي مسوي ذكي ودي ادري وش في الشنطه بدون مابي قلت اعطيك اياه بشرط انك تعلمني وش الغرض عشان تأكد انه انتم ربعنا قال اخلص وطلع اليورانيم المخصب قلت تهبا والله انت اللي طلع المخصب انا ماطلع شي جا واحد من اللي وراي اخذ هالشنطه واعطاه اياه وفتحها وتأكد قال تعال شف ولا معه لابتوب قال هذا حسابي فيه المبلغ المطلوب لكن انا مراقبه حركاتي ماقدر احولك ابعطيك البطاقه والرقم السري وانت حولها للي تبي انا اطلع منها الحين .. فجأة اشوف انوار هليكوبترات وسفاتي ودنيا.. مداهمه ونفس ماصار باستراحة الفساد رمشة عين ولا مافيه احد الا انا بس الفرق هذي مداهمة قوات الطواري والقوات الخاصه وكل شي عسكري يخوف جاي يداهم وواحد بالمكرفون يصوت معشي سلم نفسلك لعنة الله عليك وخلنا نروح نشوف حريمنا ترا المكان كله محاصر اثاريه نفس الشرطي اللي باول تفتيش بس هالمره محاصريني صدز قلت مابدهاش وارقا للسطح واشوف سلك كهرب واجدع شماغي عليه واتمسك وانزل تزحلق بس الدنيا ليل على بالي طويل السلك واصقع في عامود الكهرب في الشارع المقابل مع الصقعه طقتني حوله شوي لذلك بدال ماهج عن العسكر رحت لمهم ركبت حدا السيارات وانا قلت اشوا فكني الله مامسكوني حرك حرك بسرعه واناظر في السواق وتسطع بعيني نور قوي ولاه انعكاس اناور الشارع في النجوم اللي على كتوفه <<< ( صورة عسكري من كثر الرتب صارت بدلته تقل ملاهي كلها الوان )
7
7
7
مشا وقال جابك الله يامعشي وين الدراهم ابفتح الباب ابطب ابنط شي مافي فايده قال لاتحاول وين الدراهم بس قلت عطان بطاقه والرم السري ومنحن صلاحية كامله مشينا لبنك احولك الفلوس ابتعد عن الانظار شوي ووقف في مكان غير مأهول ناظرني وقال انزل وافصخ ثيابك قلت لا افصخ انت اول قال امش لاتعطلنا قلت لا شف بنطق قرعه واللي تطلع فيه يفصخ هو الاول طلع المسدس واطلق بالسماء وبرمشة عين صرت كما خلقتني امي << رمشة العين ماتجي الا بالشي الشين اشوف الهجه ماتجي رمشة عين
رما علي ملابس نسائية قال البس ( هاه لا وشوله وشو متى ) <<< كل ذولي طلعن معي واطلق رصاصه ثانيه بالهواء لبست تنوره لكن ماركبت صح فيه شي مدقر قمت ولبست تنورتين وحده في فخذ ووحده بالثانيه المنطق الوسطى مكشوفه للعيان النصف الفوقاني قال مهب لازم خل الفنيله حقتك مافي اشكال بتصير عليك عباة بس ودي ترز رجليك عشان يشوفون طرف التنوره وبس حتى شعرك مهب لازم تحجب وقضينا وجلسنا نص ساعه انا وياه بنسوي التحجب حق الحريم وعجزنا مشينا وانا مادري وش سالفة هالملابس والحاله ذي

وقف عند بنك قال انزل وادخل مع القسم النسائي تلقا موظفة اسمها عهود قلها ( انا جايتن اخطبك لاخوي ) هي بتعرفك على طول وبتسوي عملية التحويل لحسابي وتراني واقف هنا اي حركه مش ولابد ترا مني انا بخليك تخيس بالسجن وكل ماطلعت ادبرلك جريمه ثانية ومن شين الحظ بنفس اليوم جايتن للموظفة هذي عهود وحده بتخطبها صدز وذي تكلمها عن اخوها وهي تحسب انها من طرف هالعسكري قالت لها كم حسابه الاخت استغربت بس قالت مادري والله لكن اعطيك رقم جواله وتفاهموا وراحت هي وعهود مخططه تدق لامن العملاء خفوا شوي لكن معشي صاحب الرقم القياسي والمسجل في موسوعة جينيس للارقام القياسية بالحظ الشين والنكبات المتوالية دخل على البنك ونحر هالموظفه حتى لابسن زبيريات بس ماحد انتبه وقلت لها انا جاي اخطبك لاخوي ( ماخذت على التكلم بصيغة المؤنث ) ناظرتي من فوق لتحت قالت اكيد انتي متجسسه علينا ياحيوانه وقامت وتجرني مع عباتي <<< ماخقيتوا معي وانا اقول تجررني مع عباتي
يوم طاحت العباة وشافوا الشكل والبس وتنوره يمين وتنوره يسار والوسط استريح استعد اطلقن صرخه مدويه وقامت الدنيا وكل وحده تنحاش مع جهه الضابط شاف القطعان تهجهج مع الباب وراخ جا دخل وانا بحركه خطافيه قضبت الباب وعضيت تنورتي وركضت <<< ياسلام ياتنورتي
اركض واركض والناس تمر من عندي اللي يضحك واللي يصد واللي حامت تسبده وياقف قدامي العسكري ماغيروه اللي ماشاف مرته من كم شهر <<< ياخي خذلك مسيار وارحمني
وهو نفس الحاله يصارخ ويصوت بالمكرفون.. حاصرون الشرطه مع كل الجهات وقفت انا وايديني تحت كني واقف قدام لاعب بيشوت فاول متخذ وضعيه التغطيه قال العسكري استسلم وارفع ايديك رفعتها وقال للجندي كلبش ياولد قال خله ينزل ايديه قال كلبش وانت مغمض

يخلق من الشبه اربعين ..

بعد التحقيق معي واخذ البصمات والاعترافات تبين انه فيه شبيه لي هو اللي مبلغ عليه يوم اني عند نقطة التفتيش جا هو وهو شارب ريحه خايس لكن لانه متنكر محد عرفه زود على تسذا مصادق واحد وغاشه بوطني وفقد كم يوم نام وصط خزان ماء لقوه بسوق الحديد جايين بنقاليه سارقين هالخزان وهو فيه
نفسي بالشكل والاسم الفرق اني معشي النمل وهو معشي الجمل لكن بما انه مافيه دليل ضده تم اطلاق سراحه وانا اللي اكلتها لكن بعد ماتعاونت معهم وعلمتهم عن الضابط المتستر وعن نور الدين وعن حقين اليورانيم اللي طلع متخدرات وانا كل هالوقت فاهم غلط بس الاغبياء على بالهم بيبعدون الشبهات سموه يورانيم خففوا حكمي لسنتين بس
قضيتها في السجن اللي تخصيب اليورانيم منتشر فيه بشكل كبير <<< لحد يسألني شلون دريت

بعد ماطلعت سويت اعلان اي واحد من الاربيعين تبعي يسجل معلوماته بالسفاره السعوديه بعد اكتمال النصاب سوينا حفلة تعارف وطلعوا كلهم الخطه نصب واجرام معشي الجمل ومعشي الفحل ومعشي البصل مافيه الا واحد اسموه بس معشي ماله عايلة ماهوب مثلنا حمولة قلنا وش معشي انت .. قال ابعشيكم عشان يصير اسمي معشي الاربعين حرامي << يصلح اسم فلم
لكن سميناه معشي الخبل لانه شكله زلابه وسبهه حتى الشنب استحا يطلع بوجهه

خطمه حول الموضوع :-

الا على طاري الشبه تعرفون الدكتور غسان حق شاعر المليون هذا وجهه طويل تقل درج مكتب مشبهه بدرج عندي وغدته ( الغده = المنطقه بين الحنتس والرقبه ) تاصل لين ديوده هذا يدل على ان الحلاقه بالموس ماهب زينه
اتمنى انه مايكون فيه تسع وثلاثين مثله

فايدة من هالقرق

1 - لاعاد ترد وانت نايم الا وانت مركز لانه من بداية السالفة رايح اودي ولد خالتي للمستشفى وانا اصلا ماعندي خالة وغير كذا دقق بالصوت لاني وانا طالع مريت من عند امي بالصالة وقلت لها تبين شوي وانا جاي

2 - نصيحه بما اننا على ابواب العطلة ابعدوا عن الاكل المكشوف ياعيال ترا ماتسوا تضيع عمرك عشان نص ساعه وتراني مبالغ بنص ساعه ولا متأكد انكم دقيقه دقيقتين بالكثير <<< طراه ان حبوب مضادات الاكتئاب عليها سحب

3 - بقول مثل اللمبي ماقال في احد افلامه نصيحه لكل شب وكل فتاة لاتنحرف والقريمه لاتفيد واحب اهدي اغنية لامي بعيد الام ست الحبايب ياحنان انتا

ههههههههههههه

نبي ردودكم على الموضوع ..
lol!

مشكـــــــور على المشاركة الجميلة

وننتــظر المزيد....... santa